乡间舞火龙

白话广州

今年嘅中秋节，好多市民都留意到，白云区举办火龙文化节。而呢个文化节，已经办到第七届了。

讲起舞火龙，生活喺市区嘅街坊可能都未必清楚。事关呢项民俗，旧时盛行于西村、南岸、增城、从化等地，每每喺空旷嘅农村地区举行。相比之下，民居密集嘅老西关都好难见到啦。

火龙一舞起，场面之壮观的确令人赞叹。火龙通常以竹篾为骨，稻草为皮肉，有啲地方仲会用两个芋头来做龙眼，再斩两条枝丫做角，咁样，一条威风凛凛嘅火龙就做成啦。

到咗夜晚，“烧花塔”之后，村里面就选好十几个后生，将燃点嘅香同蜡烛插入龙身，一边舞动，一边唱起吉祥嘅歌谣：“龙来到，揾钱揾无数；签钱买草绳，今年又太平；签钱买元宝，明年娶新抱……”火龙会喺成条村巡游一次，务求将福气撒播到每个角落。

讲到呢度，唔少人都会好奇：成条龙插满香烛，火星飞舞，后生唔会烧伤咩？

其实，以前舞龙嘅后生，唔单止唔会着防护衣物，好多人仲会打赤膊上阵，任由火星喺身体上留低印记，话咁样先代表心想事成喔。时至今日，人就无咁迷信啦，舞龙时，佢哋唔单止会着衫带帽，仲会戴口罩做好防护，睇上去比以往稳阵好多。

但系，嗰份热闹同埋气氛，咁多年来，始终都系无变过嘅。

◎周公子 自由职业者

新闻推荐

到从化品吕田头酒尝古法烹牛 莲麻小镇吕田头酒文化节将持续到3日

10月1日，吕田莲麻小镇，直径三米的巨锅现场烹煮一千多斤的牛。信息时报记者叶伟报摄信息时报讯（记者王智汛）昨日上午，2018...