有趣嘅食物代词（上）

白话广州

最近睇到一条微信，讲宜家嘅广州人闹人、贬人唔使讲粗口“五杰”嘅，而系借用食物名代替。呢啲食物代词盏鬼有趣, 文明得嚟又不失贬义词本色, 好有意思。小弟从今日开始，分三篇文章，解读一下呢啲闹人嘅食物代词。

广州有种食物叫肠粉，但同时又有另一种食物叫粉肠。肠粉平平淡淡做番佢嘅肠粉，但粉肠就忙得多喇，佢要“兼职”成闹人、损人嘅代词（相当于普通话“蠢货”嘅意思），比如“你条粉肠呀，搞弯咗单生意”、“正式粉肠嚟嘎，咁都搞唔掂”。

点解“粉肠”俾借用嚟闹人嘅？因为同佢“出身”有关啰。粉肠即猪肠，系存储猪屎嘅邋遢地方，虽然亦可成菜，但始终都属于“猪下水”，上唔度大台嘅，所以，咁样嘅下栏食物，唔用嚟闹人真系好嘥。

广州人过年都会食一种油炸食物——蛋散。呢个食物特点就系松脆，正因为呢个特点，蛋散俾人借用作形容不学无术或者无乜用嘅人。因为蛋散脆弱、易碎，唔够硬净，一碰就散，又真系可以同冇用之人划上等号。

蛋散有个“兄弟”叫番薯，因外型蠢钝，所以俾人用嚟形容反应迟钝或唔够醒目嘅人。周星驰喺电影《唐伯虎点秋香》中曾用“一嚿番薯，几件蛋散”嚟奚落华夫人嘅家丁。“番薯”仲引申出“薯头”、“薯脑”呢啲嘲笑人嘅词组。

◎阿六 律师

新闻推荐

广州市国民营养计划实施方案印发，提出研究建立市营养健康指导委员会 推动有条件的学校幼儿园配营养师

□本版撰文信息时报记者何小敏推动有条件的学校、幼儿园等场所配备或聘请营养师；提高母乳喂养率，在公共场所、机关和企事业...