“冷”言“冷”语

白话广州

呢几日广州认真冻，于是乎周街都听到街坊嘅“冷言冷语”——讲嘅系同冻有关嘅粤语形容词，几有意思嘎，趁“冻”同大家分享几个。

星期一上昼喺小区门口见到陈师奶。呢位师奶一入门就嗌：哎呀，冻到打冷震呀。

“打冷震”系形容身体冻到喺度震，意思同普通话“打寒颤”差唔多，只不过，广州唔同北方，天气最多系“冷”，而未到“寒”。同“打冷震”意思相似嘅仲有一个词叫“腾腾震”。著名粤曲《万恶淫为首之乞食》讲男主角寒夜乞食，第一句歌词就系“冷得我腾腾震”。

讲番陈师奶，佢边打冷震边讲：“出面冻到雪雪声呀，返上去着番件冷衫先”。呢个“雪”字系象声字，既可以指人受冷个口发出嘅声音，又可以指落雪嘅声音，用得好妙。“冷衫”（“冷”读laang1）个“冷”字最初系来自法语嘅laine（毛线），但转成中文亦够晒恰当：“冷衫”——天冷着嘅衫。

讲到“冷”，普通话有个词叫“冷冰冰”，形容人态度冷淡；而粤语有个类似嘅词叫做“冻冰冰”，不过，呢个词纯粹形容天气冻。

粤语中嘅“赤”字，有痛嘅意思，如头赤。但用喺天气方面“赤”就“偏爱”冻天，因为只有讲“冻到头赤、手赤”而冇话“热到头赤、手赤”。

粤语“冷言冷语”系咪好丰富呢！

◎阿六 律师

新闻推荐

去两博会体验冰雪世界 说不定还能邂逅奥运冠军

■观众体验真冰冰壶。通讯员供图■中国奥运金牌第一人许海峰。新快报讯记者吴晓娴报道羡慕北方下雪的浪漫？去两博会，不出广...