猪与广州地名

白话广州

再过多十日八日就系猪年喇。写啲乜同猪有关嘅嘢应下节呢？左谂右谂，不如写一下猪同广州地名啦。

喺街坊印象中，广州好少有叫“猪”嘅地名。的确系咁，但宜家冇，唔等于以前冇，市区冇，唔等于郊区冇。

宜家东山有一个地方叫做竹丝岗。以前东山系荒郊野外，竹丝岗以前系山岗嚟嘅。咁竹丝岗又同猪有乜关系呢？关系大呢——古代嗰度系叫做“猪屎岗”。顾名思义，当地曾经系猪栏，因猪屎多而得名。后嚟，呢度慢慢变成城区，咁自然唔可以再用一个咁嘅名喇，所以就用近音字“竹丝岗”代替，即刻文雅晒。

喺天河车陂有个地方叫做龙口（即龙口大街一带），呢个名几有霸气。但解放前，呢度系叫做“猪乸口”。点解反差咁大呢？民间传说，民国时期当地曾出现过一件怪事：每日凌晨，呢一带嘅村民经常见到一只猪乸出没，偷食田里面嘅农作物，但到咗天光，俾佢偷食过嘅农作物又完好无损。村民认为呢只“猪乸”好诡异，所以就将当地叫做猪乸口，直至解放后先改叫龙口。

宜家喺市区好难揾度叫“猪”嘅地名喇，但郊区仲保留住一啲，比如：花都区炭步嘅猪横街，增城区仙塘嘅猪氹巷，番禺区大石嘅猪鼻巷、钟村嘅大猪兜大街，白云区钟落潭嘅马洞猪古岭路……呢啲地名，相信亦系一“猪”一段古。◎阿六 律师

新闻推荐

困难群众殡葬基本服务费最高可免3030元

困难群众殡葬基本服务费用最高每具可免费3030元。昨天，记者从广州市民政局获悉，为切实减轻困难群众办丧负担，该局制定了《广...