此“虾”非虾

白话广州

早几日，小弟喺员村哨街，睇到一个食虾专门店嘅街招写住“虾虾霸霸成条街”，真系盏鬼有趣。大家都知啦，粤语欺负系读“虾”（亦有读“洽”），“虾虾霸霸”系指欺压霸道嘅意思，而呢句广告词巧妙借用此“虾”去讲彼“虾”，都算度得靓啰。

不过，话时话，粤语“虾虾霸霸”嘅“虾”，只系一个同音字，原字应系“吓”。

粤语方言系冇“欺负”嘅讲法，表述呢个意思系用“吓”(欺负带有恐吓成分)，但因为“吓”本身有用法同读音，所以为咗区别，就将表述欺负意思嘅“吓”读第一声“haa1”。由于佢音同“虾”，咁坊间就索性写作“虾”。

事实上，粤语中有几个常用嘅“虾”词组，都系同虾冇关嘅。比如“苏虾”，有人以为因为BB仔似只虾挛埋所以咁叫，其实唔系嘅。“苏虾”正写应为“臊孲”，其中“臊”系指啱啱出世嘅BB身上嗰啲奶臊味，而“孲”系指幼儿，呢两个字都系古汉语。“苏虾”系“臊孲”嘅转音字。

近十年八年，广州坊间多咗一个形容尴尬场面嘅“虾”词组——虾碌。呢个词组最初系由香港传入嘅。好多人唔明：点解将虾切开一碌碌就系“尴尬”嘅？各位为食猫：“虾碌”原意系英文“hard-luck”（倒霉），“虾碌”只系“英”转“粤”。此“虾”同样非虾。

◎阿六 律师

新闻推荐

让城市有高度，让时尚有温度 2019广东时装周—春季广州开幕 暨2019新快报风尚大奖颁出

“与你时尚同行，共同致敬梦想”，3月18日晚，“城壹荟时尚之夜”2019广东时装周—春季开幕式暨新快报21周年“革故鼎新，逐梦前...