另类“美食”

白话广州

某日某同事喺办公室里边订饭，睇完菜单之后即刻大叫“我要食豆角炒鲜鱿”，隔篱嗰位阿叔马上答咗句“整多个冬菇炖排骨以毒攻毒啦”，霎时间哄堂大笑。

广州人中意食，所以广州话里边有唔少盏鬼得意嘅说话，呢啲说话同食或者系物有关。就好似上边提到嘅“炒鱿”同“炖冬菇”咁样，听落好似几好食。但事实上职场中人都比较“棹忌”，因为呢两个词都系“被解雇”嘅意思。

至于我哋经常食嘅猪肉，就更多呢啲词汇喇。譬如我哋细个成日食嘅“藤条炆猪肉”，呢道“阿妈名菜”个个都食过。考试考得唔好又或者上课开小差俾老师告状，呢个时候返屋企就真系怕怕——阿妈嗰条藤条打落嚟，炆到你嗌救命。至于“滚水渌猪肠”就俾歌神许冠杰唱到街知巷闻，呢句说话嘅下一句“两头缩”系好多“月光族”嘅心声。正宗嘅咸猪手好好味，不过女士们就最讨厌嗰啲中意郁手郁脚嘅“咸猪手”。

除咗借喻之外，广州人仲中意用食物来讽刺。譬如“蒸生瓜”，点整都唔好食，话某人傻头傻脑又蠢又笨；“苦瓜炒鸭”，苦瓜啲苦味入晒鸭肉里边，苦上加苦，广州人有句话叫做“苦过DIDI”，就系从呢道菜出来嘅。

广州有好多美食，但有啲又唔可以随便“食”。至于点样食，就要睇你粤语过咗四级未喇！◎李月婷 媒体人

新闻推荐

动画片《巨兵长城传》传递勇气

信息时报讯（记者管安琪）正在嘉佳卡通卫视播出的少儿冒险动画片《巨兵长城传》近日在广州举行粉丝见面会，现场启动一个“巨兵...