“鸡翼”越秀南

白话广州

越秀南客运站过埋今个月就正式“退役”喇，之所以要搬走呢个站，据讲主要系为咗减轻客运交通对老城区嘅影响。

相对于其他客运站来讲，越秀南客运站所处地段的确就系寸土寸金嘅老城区。“老”到咩程度呢？咁就要讲下越秀南呢条路喇。

广州老城区嘅路都讲求“对称”，既然有越秀南，咁就肯定有越秀北。大致可以理解为一段“越秀路”，以东风路、中山路为界，分开南、中、北三段。“越秀路”之所以叫“越秀”，唔系因为佢喺越秀区，而系因为“粤秀书院”。粤秀书院建于清朝康熙年间，系广东四大书院之首。据考究，呢间书院喺当时嘅禺山附近，大致方位就系依家嘅北京路左近。

呢条越秀路比较有趣，佢嘅“路形”同东濠涌嘅走向大致相当。追溯到明清时期，呢段路就系广州城嘅东城墙。以前广州嘅城墙好似一只“鸡翼”，所以又叫“鸡翼城”，越秀南呢段嘅弯位特别多。有人话，从万福路到东园横路呢一段，越秀南有三个细细嘅弯位，呢几个弯位就系以前“鸡翼城”城墙留返落来嘅。

越秀南有好多红色史迹，最出名嘅就系佢同东园横路交界处嘅团一大广场。有个地方唔系太出名，不过亦都值得一提——依家嘅越秀南小学，系广东妇女解放协会旧址。呢段路，可以缅怀嘅唔单单系客运站。◎李月婷 媒体人

新闻推荐

天河主打科创 越秀聚焦文创2019广州国际投资年会，各区亮出优势产业

2019广州国际投资年会，各区亮出优势产业