“广州花园”有地利

白话广州

花城广州点少得“广州花园”？规划咗好耐嘅“广州花园”最近出咗方案，麓湖花桥、广园路起高架或隧道、有地铁口同停车场……真系够晒吸引。

真系希望广州花园可以快啲起好。试谂下，依家麓湖同白云山之间隔咗一条广园快速，车多杂乱。起好咗条高架或者隧道，咁以后上白云山就可以行“花桥”过去，几咁浪漫诗意。依家每逢节假日大型花展，云台花园都必定人山人海，睇人头多过赏花。以后空间扩大咗，连带白云山南门一片都系“花园”，又有地铁站，交通方便，以后肯定又系一个“打卡”点。

广州花园选喺呢个地方，可以话啱晒大家心水，因为白云山本身就系个景点。自古以来，“羊城八景”都有白云山份，“蒲涧濂泉”“白云晚望”系上榜常客，之后又有“白云松涛”“云山锦绣”同“云山叠翠”。其中，“蒲涧濂泉”同依家嘅一个节诞有关系，佢就系啱啱升级市非遗嘅“郑仙诞”喇，而且“蒲涧”呢个地名都同郑仙有关。据讲郑仙系秦朝嘅一位医生，佢用白云山上边一种叫做九节菖蒲嘅草药医好咗好多人嘅病。有次佢采摘九节菖蒲坠落山崖，于是后人就将山崖下边嗰条溪涧称呼为“蒲涧”。

广州花园选喺白云山脚真系最合适，呢度除咗景靓，仲有好多古仔，你话系唔系？

◎李月婷 媒体人

新闻推荐

“五一”4天假期，到哪里玩好？

苏州风光。俄罗斯美丽风景。丽江风光。当“五一”放假四天的消息宣布的当天，就已经有不少人抢先预订了出游行程，紧接着，一批...