转线要就脚

白话广州

喺广州，街坊无论坐公交定坐地铁都好方便。粤语有句俗话叫“就脚”，如果攞佢来做标准衡量，估计唔少街坊都会提出一点希望，就系我哋嘅地铁转线要就脚。上周有新闻话，三号线同五号线转线嘅珠江新城，接落来将会大改造，其中最大嘅目标就系无障碍换乘。呢个真系一个好消息。

依家唔少地铁交汇，换乘站通常都人虫人蚁，无论广州定其他城市，都系咁。转线够唔够就脚，确实会影响人流畅顺。系广州，坐惯地铁返工嘅上班族，行多咗，都识得转线嘅窍门，所以网上通常亦流行一啲“换乘攻略”等等。举个例子，坐八号线转二号线，据说最方便嘅就系坐车尾部分，一落车就可以行楼梯向下转个弯就到。如果你上到顶层，再落返去，估计多花十几分钟。不过，呢条所谓嘅捷径，能容纳嘅人数有限，所以指示牌亦唔会直接指乘客行呢条路，快定慢，就睇你自己谂计仔。

当然，唔同线路嘅转线站，点样设计先令街坊满意，估计亦唔似我哋想象得咁简单。不过，多用“就脚”作为标准，先系换乘站设计嘅正路。有啲城市某啲线路，换乘可以一出车厢，唔使行几远，走到对面就系另一条线，呢种换乘方法，就算人流十分密集，亦唔会令月台人逼人，相当流畅。呢点，应该多推广。

◎闻歌 媒体人

新闻推荐

广州法院今天宣判一批涉黑恶案，67人获刑 “黑老大”传位给儿子 坐轮椅听判获刑16年半

“黑老大”肖某保坐轮椅听判说案今天消息羊城晚报讯记者董柳，通讯员、毛梦、朱璐、刘娅摄影报道：5月13日，广州市两级法院集...