“唔该”嘅N种用法

白话广州

本周一，同事讲咗佢经历嘅一件趣事：当日喺广州火车站，一个外国人问佢售票点喺边度，佢讲咗之后，呢位外国人好有礼貌咁用粤语致谢：“冇客气”，旁边好多人都笑起身，其中一个师奶讲：应该讲“唔该”。

粤语中嘅礼貌用语好多同普通话系一样嘅，比如“冇客气”（不客气）、“多谢”（谢谢）等，但有一个就零舍唔同嘅，就系前面师奶所讲嘅“唔该”。

粤语“唔该”相当于普通话嘅“谢谢”、“劳驾”，但实际使用中，因语境唔同，仲有多种解释——

“滚水嚟喇，唔该借一借”。“唔该”系麻烦嘅意思；

“呢只牌子啱啱卖晒，唔该你拣过其他啦”。“唔该”系请嘅意思；

“唔该你啦，生下性啦”。“唔该”系拜托嘅意思；

虽然“唔该”同“多谢”都有得到帮助后向对方致谢嘅意思，但仲系有区别嘅，“唔该”可以事前讲，如“靓女：唔该，帮我开下门”，又可以系事后，如人家主动帮你开咗门后，你先讲“唔该，靓女”。而“多谢”只有事后讲。

讲“唔该”，有时甚至可以唔叫称谓，比如“唔该、唔该，呢附近边度有公厕？”有“唔该”开头，对方亦唔会认为你冇礼貌。

从字面上睇，“唔该”有唔应该嘅意思，即应该自己做嘅事人家帮你做咗，所以亦有表歉意嘅意思。

◎阿六 律师

新闻推荐

高考在即 各种骗局须提防 广州警方发布预警拆穿各类高考骗局

信息时报讯（记者罗阳辉通讯员张毅涛李柰）高考前后，有不法分子打着查分数、改成绩、领取奖学金、内部名额录取等各种名目伺机...