旧工厂 新活力

白话广州

对于新一代广州人来讲，红专厂曾经系一片游玩胜地，好多人都喺呢度留低咗集体回忆。而家，红专厂要局部拆除来起少年宫，大家觉得唔舍得，亦都系人之常情。

凭心而论，呢类工业建筑，又的确几有味道嘅。红砖车间、黑色机器带来嘅粗糙质感，同鲜花、木条凳、咖啡馆嘅细腻感觉相碰撞，每每营造出时光隧道嘅气氛。难怪，类似嘅工业园活化，会成为近年嘅一股潮流。

不过，中意呢种感觉嘅人，亦唔使因为红专厂拆咗而感到失望。因为喺广州，类似嘅活化例子其实仲有唔少。例如芳村大道东毓灵桥旁边嘅“协同和机器厂”，原身系近百年嘅厂房，曾经制造出中国第一台柴油机。如今，佢已经变成“宏信922”创意园，容纳咗好多时尚、创意公司在此孵化。新与旧嘅融汇，擦出咗唔少火花。

增城糖纸厂，如今亦活化成一座婚礼体验馆。旧时嘅烟囱、窑炉被一一保留，营造出沧桑嘅感觉，亦赋予婚礼一种别样风情。

有咁多工业建筑活化嘅例子，系因为广州拥有深厚嘅工业遗产。旧日嘅羊城，唔单止系千年商都，亦有工业大道、员村、白鹤洞、西村、芳村呢类老工业区。随住城市变迁，工厂虽然移走咗，但遗迹却成为一笔财富，等待住我哋去发挥创意，大做文章，为新时代嘅广州增添更多养眼嘅风景。

◎梁倩薇 编辑

新闻推荐

增城供电局电力科普进校园

活动现场。本报讯（记者陈华宇文/摄）6月28日，南方电网广州增城供电局联合区教育局、中新镇教指中心在中新镇中心小学开展“亮...