地名歇后语

白话广州

广州嘅地名，除咗可以帮你了解旧时民俗，间中仲可以帮你抒发下感情又或者“瘀”下人。唔信？等我话你知。

好似地标白云山，唔单止典故多，俗语亦都唔少。最常用嘅“白云山唔够一担泥”，既有“眼阔肚窄”嘅意思，亦都有“手高眼底”嘅含义。虽然白云山系市内第一高峰，但相对于北方嘅名山大川来讲，佢的确唔算高，远远望过去就好似“一担泥”。不过，你唔好睇小呢座山，要爬上去“天南第一峰”都有排行，所以就有前面呢句俗语喇。仲有一句歇后语，叫做“白云山蟋蟀——得把声”。据讲白云山开发以前有好多蟋蟀，呢种蟋蟀嗌起身声音洪亮但不善于打斗，呢句歇后语就系用来形容嗰啲声大大但又冇乜实际行动嘅人。

假如你唔知某啲老街嘅历史，知道佢嘅歇后语就大致可以清楚喇。譬如海珠广场附近嘅泰康路，旧时系山货市场，有唔少出售竹制盛物器具嘅店铺，包括“篸”。“篸”系广州方言，发音同“惨”一样，系一种用竹编成嘅筲箕。因为泰康路卖“篸”又平又靓，所以就有“泰康路——好篸（惨）”嘅歇后语喇。

类似嘅歇后语或者俗语仲有好多，比如“三元宫土地——锡（惜）身”“大马站过小马站——相差唔远”，同埋“市桥蜡烛——假细芯”等等，读起身盏鬼抵死，几有意思嘎。

◎李月婷 媒体人

新闻推荐

舞韵飞扬 美耀羊城

新快报讯记者毕志毅摄影报道7月10日、11日，由广州市教育局主办，海珠区教育局、海珠区少年宫承办的2019年广州市第四届“羊...