“一盅两件”体现悭俭

白话广州

讲到节约粮食呢种美德，不得不提一下广州人嘅“一盅两件”。

饮早茶，广州人亦叫做叹早茶，虽然系讲“叹”，其实并非一种奢侈消费。以前饮早茶有句俗语叫做“有钱楼上楼，冇钱地下踎”，亦从另一个角度讲明，无论富贵贫穷都可以叹得起早茶，因为饮早茶系一种相对悭俭嘅饮食方式。

描述广州人饮早茶嗰句经典话“一盅两件”，就系体现咗呢种“悭俭”。一盅，系讲嗰壶茶；两件，就系指点心。两件点心，一人份量，唔多唔少，啱啱好。

广式早茶茶点嘅份量，似乎系为节约而度身定做。大家睇下，无论系“四大天王”（虾饺、烧卖、叉烧包、蛋挞），还系“八大金刚”（肠粉、糯米鸡、萨琪玛、蛋散、煎堆仔、咸水角、牛肉丸、排骨），只要两件，足可饱肚。

相对于大鱼大肉嘅食饭，饮茶更为实际。唔理有几个人，大家都可以根据各自喜好同食量去点，唔会浪费。饮茶宜家已发展到有下午茶、夜茶，好多酒楼甚至全天茶市，因为大家都钟意呢种“啱啱好”嘅消费。

喺广州街头巷尾，“得闲饮茶”总比“得闲食饭”响亮得多，因为大家都明白，可以“一盅两件”搞掂个肚，就冇必要八菜一汤。◎阿六 律师

新闻推荐

经济新动能 民企新力量 创二代来啦！

经济新动能民企新力量创二代来啦！总策划：刘海陵林海利总统筹：孙璇吴江执行：孙晶李卉赵燕华文/...