因为爱，用公筷

白话广州

食饭你用唔用公筷？上周，信息时报做咗个调查，发现唔少街坊最常用公筷嘅地方系餐厅酒楼，而唔系屋企。“我都好想用，不过屋企人做唔到”，有人就咁话。

用公筷有乜嘢好处，大多数人都一清二楚。事关一人一对筷子，口水会跟住啲筷子，落晒啲菜餸度，如果当中有人感染病菌，就好容易传俾一起食饭嘅人。呢几年睇新闻，唔少得人惊嘅病例，就因为冇把好“筷子”呢道关，搞到成家人都染上，确实值得警惕。

话时话，点解有啲人唔用公筷？最常见嘅原因不外乎两个：一系嫌麻烦，用惯一对筷子，难以形成两对筷子轮流上场嘅习惯；二系大家唔统一。唔少街坊，去酒楼都会乖乖哋用公筷，不过返到屋企就放松晒，唔用。佢哋嘅谂法大多系，自己人使乜嘢咁见外呢？“你细个究食过我唔少口水啦，米一样养到你肥肥白白？”有啲街坊晒出父母嘅搞笑说辞，话父母难以讲服。谁不知，就因为系最亲近嘅人，同煲同捞，日日一齐食饭，更应该加一道防线，守护大家嘅健康先得。

所以，一定要做通屋企人嘅思想，话俾佢哋知道，用公筷并唔系“见外”，恰好相反，系爱佢哋，保护佢哋。

◎闻歌 媒体人

新闻推荐

我的足球梦

朱逸言万松园小学六年级指导老师吴沙鸥梦想是什么？梦想是一个人努力的起点。每个人都会有自己的梦想，并且都很想实现它，所以...