无人驾驶渐近

白 话广州

新闻话，而家逛海心沙亚运公园会有“惊喜”，你可能会唔觉意见到有部圆碌碌嘅橙色车仔，喺路上慢慢噉开。原来呢个系一部无人售货车，只要游客招下手，又或者扫车身上边嘅二维码，部车就会停低。等游客买完嘢，部车仔又会自己继续往前开。

听落真系方便，喺而家咁晒嘅户外，唔使行就见到无人售货机。最令人惊讶嘅系，佢系一部唔使人嚟开嘅自动驾驶车。睇到呢个，你可能先醒悟：无人驾驶又行近咗啦。

早喺2018年，无人驾驶的士就已经喺大学城开始试运营，不过仲需要有司机“坐镇”睇住。旧年11月，黄埔区、广州开发区亦都有无人驾驶嘅的士上路试运营，车入边只有安全员，基本上部车都系自己开，虽然车速唔快，但系一般嘅路况已经难唔到佢，除咗直路、转弯、红绿灯停车、避让行人呢啲简单嘢，仲识得区分隧道、桥梁、高速公路、早晚高峰复杂路况，连夜晚、落雨呢啲恶劣环境都可以应付。据讲，安全员净系喺极端情况先会介入，好似整路呢啲不可预知嘅情况噉。

嚟紧，南沙要喺明珠湾打造智能驾驶示范段。到时，喺路边，你可能随时都会拽到一部无人驾驶的士。

◎阮栩 编辑

新闻推荐

广外黄埔研究院下月入驻知识城校区 首批安排高级翻译学院、法学院2020级硕士生入读

信息时报讯（记者孙小鹏实习生郑植方通讯员广外宣）日前，记者从广东外语外贸大学了解到，学校与广州开发区管理委员会近日正式签...