七夕新过法

白话广州

前日系七夕。今年嘅广州乞巧文化节上星期已经开幕，一直持续到呢个周日。虽然受到疫情影响，但系呢个传统嘅民俗依然可以办出新意——线上线下同时过节。喺线下，开展小场景嘅民俗文创活动，好似“巧手巧艺”摆七娘、“焚香虔心”拜七娘、“得巧祈福”送七娘、“美味新意”七娘饭呢啲传统节目，照样喺珠村举行；而线上就开展直播，等更多嘅人可以观赏得到，了解广州嘅乞巧文化。

以前嘅七夕，实际上系古代嘅“妇女节”。好似摆七娘，呢啲都系女仔嘅小玩意，简单嘅就绣啲荷包，复杂嘅可以自己整出成套亭台楼阁，好似而家砌乐高噉。不过佢哋用嘅系米粒、芝麻、灯草芯同埋彩纸。胭脂花粉、蜡制瓜果、人仔、彩灯、鲜花，呢啲嘢全部都系女仔最中意嘅。喺呢个节日，啲女仔仲可以名正言顺噉扮靓靓，“拜七娘”，祈求未来婚姻嘅美满，十足十系古代版嘅“青春宣言”。

而家，七夕嘅节目已经越来越丰富啦。除咗宣传民俗特色嘅乞巧文化节，仲有好多同爱情有关嘅主题，比如单身男女嘅交友联谊、食肆商场嘅营销噱头。今年嘅七夕，广州塔仲亮灯祝福，唔单止祝福爱情，仲祝福全体市民幸福安康。◎阮栩 编辑

新闻推荐

广州的士“夫妻档”：每天“擦肩而过”廿五载携手前行

交班间隙，陈兰香为丈夫递去消暑饮料。魏鉴中、陈兰香夫妇在广州公交集团白云（广交）五分公司，有一对优秀的出租车司机“夫...