应多啲“细蓉”

白话广州

早几日喺长寿路一间粥粉面店，听到一对拖友嘅对话。

男：我食粉，你食咩呀？

女：我都想食粉，不过又惊食唔晒，食面啦，面有细蓉。

细蓉(“蓉”读“拥”)，相信大家都知道吧，就系细份量嘅云吞面。

云吞面发源于清朝嘅广州西关，因云吞煮嗰时浮起身好似一朵朵盛开嘅芙蓉花，所以又叫芙蓉面。

最初嘅芙蓉面剩系得一个份量(即宜家嘅大蓉)，后嚟因为迁就一啲西关大少而分咗大细嘅。以前啲西关大少平时食饭就有鱼有肉，嗰肚长期油水充足，加上又唔使做体力工作，所以胃口比较细，食云吞面嗰时正常份量就食唔晒，于是佢哋就纷纷要求店家减量，咁就出现咗细蓉喇。

虽然大蓉细蓉之分系一种民间“约定”，冇明确到具体份量，但行内亦有一个大致嘅行业标准：大蓉两撮面(约二两)8粒云吞，细蓉一撮面4粒云吞。

粥粉面本身就系同一类既简单又节俭嘅小食，但三者中面喺份量设定中，更可人性化咁体现唔浪费嘅食法。

事实上，好似本文开头讲嗰个女仔，或者小朋友，细蓉对于佢哋系“啱啱好”嘅份量呢，如果大蓉就会浪费。

希望我哋食物中有更多“细蓉”。◎阿六 律师

新闻推荐

广州南沙经济技术开发区规划和自然资源局国有建设用地使用权网上挂牌出让公告 穗南开规划资源出告字﹝2020﹞19、20号

经广州南沙经济技术开发区管理委员会批准，广州南沙经济技术开发区规划和自然资源局公开挂牌出让2宗国有建设用地使用...