农讲所研学

白 话广州

喺啱啱过去嘅呢个暑假，唔少学校都布置咗红色研学嘅暑期作业。一时间，农讲所、中共三大会址纪念馆、广州起义纪念馆呢啲历史建筑成咗学生家长嘅打卡热点。农讲所，全称系广州农民运动讲习所，佢前身其实系番禺学宫，系明清时期番禺县治学嘅最高学府。前几日，我带咗啲豆丁入去参观，都算系第一次睇到咗佢嘅真容。

农讲所好多嘢仲保持住原貌，好似一入门口嘅单杠、老师嘅办公室、值星室，简简单单都系几张藤椅、木台木凳。“呢个地方以前系培养参加农民运动啲骨干嘅，你睇下呢啲衫裤，都系粗麻布嘅，呢啲鞋仲系草鞋。呢度仲有好多步枪，一次只能打一发子弹，短的系驳壳枪……”参观之后，连我都补咗唔少历史。

原嚟嗰时嘅学员已经进行军事训练嘎啦，不过训练基地喺黄花岗，农讲所学员要学射击、冲刺、投弹、列队、行军呢啲项目，仲会有实弹、巷战演习和夜间紧急集合呢啲模拟场景。仲巴闭嘅就系，第一届学员会去黄埔军校集训嘅添。

呢个简单嘅研学活动，虽然啲豆丁未必完全了解，但系，带佢哋嚟睇下、了解下，其实就系一本实地嘅教科书。

◎阮栩 编辑

新闻推荐

高温高湿“桑拿天” 吃粥正合适

■新快报记者梁瑜通讯员许咏怡一会下雨，一会出太阳，高温、高湿的“桑拿天”频繁出现。此时，不少人感觉到口腻口苦、...