再讲“氹”

白话广州

上周小弟嗰篇《广州与“氹”》提到，新版《新华字典》讲氹字系“多用于地名”，但事实上，除咗地名外，氹仲有其它用法。

“氹氹转，菊花园……”广州著名童谣《氹氹转》就用到“氹”字喇。

粤语打转亦叫“氹”，读dam4，“氹圈”亦即转圈，呢个字嘅词义来源于水坑里面嘅水搅动嗰时产生嘅旋涡。

上一篇讲氹(读taam5)嘅原意系指小水坑，但对于冇水嘅坑或凹陷嘅地方，粤语同样系用呢个字，不过就读tam1，如：喺个水氹(tam5，水坑)旁边挖个氹(tam1，坑)。

粤语中哄人系叫氹人，当中嘅氹亦系读tam5，但小弟认为，氹人嘅氹系一个同音借字，本字应该系憇。

憇，有小睡嘅意思。粤语最初呢个字系喺哄小孩睡觉时讲嘅，叫做“憇细路瞓觉”，后嚟先用喺其他人身上。

哄人就系口甜舌滑，用心计去让对方顺你意或讨好对方，从字体结构上睇，憇更符合词义，只不过借用同音字系粤语一惯做法，所以用“氹”亦无妨。

粤语中呢个氹字，既涉及有水嘅坑，又涉及冇水嘅坑，既涉及人嘅行为动作，又涉及人嘅主观意识，系咪好有意思呢？

◎阿六 律师

新闻推荐

“患委会”要发真功还需好机制

□阅尽广州医科大学附属三院近日推出新招：组建首届患者委员会，并公开招募“体验官”。该委员会由患者组成和管...