花市来啲新玩法

白 话广州

“年卅晚，行花街。”明年花市搞唔搞，好多街坊都关心。呢排，越秀区公布，花市时间系明年嘅2月9号到11号。佢哋仲向街坊公开征集对花市设计嘅建议。我就想提几点谂法：

首先，广州味系最唔少得嘅。花市除咗卖花之外，仲可以设置啲五彩缤纷嘅花灯，喺上面贴住“盏鬼粤语灯谜”，俾街坊扫码抢答，答中就送个小手信，我谂一定会调动街坊嘅积极互动。仲有，花街嘅唔同区域，仲可以用啲好意头嘅广州地名来起，譬如吉祥路、长寿路、高第街等等。有咗呢啲元素，相信会增添好多浓浓嘅春节气氛。

第二个谂法，建议花街多设啲开阔嘅休息空间。唔少街坊都会有呢种感觉，就系行花街，有时行到攰，真想揾张凳仔唞下。所以，喺花市里面应该考虑到街坊休息嘅需要，设置啲休闲嘅空间，可以坐，倾下偈，或者饮下嘢，食啲小口，俾大家舒舒服服嘅咁行花街。

仲有一样嘢，唔知花市可唔可以做到送花上门。加阵，广州嘅生鲜配送，已经超级方便，买菜或者点外卖，“嘘”声就送上门，如果花市可以引入呢啲服务，街坊就可以多一个选择。当然，自己抱住花搭地铁返屋企，亦好有气氛。

◎闻歌 媒体人

新闻推荐

广州越秀区成立全省首个未成年人法治宣传普及站

羊城晚报讯记者谭铮报道：“每年的12月4日是什么日子？同学们你们知道吗？”“知道。是国家宪法日。”“大家可能...