广州冬天嘅颜色

白 话广州

北方嘅冬天，雪嘅白色成咗主题；广州呢？如果你喺朋友圈发一下呢个问题，估计有好多唔同嘅答案。

呢排，广州人嘅朋友圈，唔少晒出嘅都系红色。最新嘅，系变红咗嘅水杉树，又叫落羽杉。喺流花湖公园、海珠湿地、麓湖、大夫山公园等地，水杉好似约埋一起咁，变成咗红色。呢点，多少弥补咗广州少见红枫叶嘅遗憾，俾街坊感受下红叶嘅味道。

第二种颜色，估计要数粉色或者白色。呢排，萝岗嘅梅花进入咗最佳观赏期，单香雪公园就有几千株梅花怒放，成为带清香嘅“雪”。呢点，亦算系满足咗唔少广州人睇雪嘅心愿。资料话，“萝岗香雪”起源于宋代，每年嘅岁末深冬，梅花枝头盛放，树下花瓣缤纷，十足一幅北方嘅雪景图。当然，除咗萝岗，市区梅花村等地亦有梅花可赏。

街头巷尾，大家最多见到嘅，估计仲系绿色。事关广州一年到头，绿叶成荫。尤其系城区路边嘅绿化树，冬天都唔会落叶，比起北方树木光秃秃嘅街头，广州真系绿意盎然。反而到咗春暖花开阵时，有啲榕树开始换叶，黄叶遍地，别有一番风味。唔止呢啲，冬天你抬头睇下，经常见到醉人嘅蓝色，可见广州冬天系丰富多彩嘅。◎闻歌 媒体人

新闻推荐

花都汽车产业基地获批省级高新区

南方日报讯（记者/周甫琦）近日，经广东省人民政府批复同意，广州花都汽车产业基地被认定为省级高新技术产业开发区（下称“广州花...