年夜饭好意头

白话广州

广州人嘅年夜饭，都讲究好意头。从买餸开始，就要谂一个吉利嘅菜名。

除夕嘅团年饭，太太落厨露一手，睇佢提前剧透嘅嘅菜谱，丰富多彩，比如“大展鸿图”“五谷丰登”“青春常驻”等等，菜名寓意非常吉利。我好好奇，再睇真啲，原来“大展鸿图”系猴头菇煲白鸽汤，“五谷丰登”系青豆粟米腰果等五种蔬果嘅汇合，“青春常驻”就系清炒芥兰苗。屋企人都开心咁点赞，有创意。

广州人嘅团年菜名，如果按照意头，大致可以分成两类：一类系谐音，比如生菜，寓意和气生财；猪脷，寓意大吉大利。第二类系形象，譬如红萝卜，寓意红红火火等。

旧阵时，街坊整年夜饭仲唔少得花腩之类嘅菜式，象征家肥屋润。不过，随住大家饮食习惯趋向健康，加阵太肥腻、重口味嘅菜式已经减少，多咗蔬果素食。另一方面，后生仔女亦有更多谂头，譬如西式嘅意面，亦可以整个“意气风发”嘅菜；而水果色拉，则象征“缤纷多彩”。

可见，年夜饭随住时代更新，大家对“意头”呢样嘢嘅理解亦不断变化。其实，要好意头，最关键嘅系心里边充满阳光，只要心怀美好，每样菜都可以有个动听嘅名字。

◎闻歌 媒体人

新闻推荐

广州地铁“夫妻档”：春节最浪漫的事 是与你共同坚守

张文辉广州地铁供图彭媚芳(左)广州地铁供图羊城晚报记者徐振天通讯员黄秀娟黎娇杏刘民又是一年团圆时，今...