城市嘅“大合唱”

白 话广州

呢排，广州海珠区一群街坊向媒体报料话，小区楼下忽然多咗啲蠄蚷，每晚嘅“大合唱”搞到佢哋冇觉好瞓咁话。呢条新闻引来唔少网友关注，有啲就话“太大声确实顶唔顺”，有啲就话“几好啊，起码系大自然嘅声音”。

熟悉蠄蚷嘅行家就话，蠄蚷就系呢排先会嘈得大声啲，过一排就好啲；而且佢哋食蚊虫，对小区防蚊除虫都有好处。我哋小区嘅假山水池，亦有唔少蠄蚷，每逢春雨将池水涨起阵时，佢哋嘅后代蝌蚪就会现身，有时仲有啲小朋友攞个樽装一两粒返去喂养观察。

我细个时住喺乡下，四五月间，每晚都会喺蛙声中瞓觉，蛙声反而衬出乡村嘅宁静。呢几年，广州嘅环境改善，我哋嘅耳边多咗唔少类似嘅“合唱”。譬如，一早四五点，楼下嘅芒果树上，啲雀仔就吱吱喳喳开“早会”。到咗六七月嘅午后，大合唱嘅主角就换成蝉仔，而且佢哋擅长高声部。晚上，蟋蟀亦偶尔加入，喺小区嘅角落不时来一两声唱和。

一个城市，有咁多天然嘅音乐，得益于生态环境嘅改善。呢啲“大合唱”，一方面系街坊嘅福气，一方面亦提醒咗我哋，珍惜同保护好自然环境，人类先会有更加和谐安乐嘅生态家园。◎闻歌 媒体人

新闻推荐

五凤村旧改项目正式签约 要求统筹承建4个公益建设项目

广州日报讯（全媒体记者全杰）日前，记者从市住建部门获悉，海珠区凤阳街五凤沙溪村、五村、泰宁村更新改造项目，分别由上述三...