此“靓”非彼“僆”

白话广州

早几日，中国女足击败韩国队获得奥运会“入场券”，因国足中有4个队员系广东人，有广州媒体就打出咗“这4个广东靓妹，好叻！”嘅粤语标题。

小弟想同打呢条标题嘅编辑老师探讨一下：“靓妹”系咪应写作“僆妹”先啱呢？

粤语嘅靓系指漂亮，可以用喺对人嘅称呼上，正因为咁，喺广州街头，经常听到有人嗌靓女(靓仔)、靓姨(靓叔)、靓姐(靓哥)，但唯独冇“靓妹”(靓弟)一说。点解？坊间认为“靓”系一种敬称，年纪太细受唔起，所以免“靓”。

虽然冇“靓妹”(靓弟)嘅叫法，但粤语有”僆妹”(僆仔)呢个词组。

僆，粤语读音Ieng1，古汉语中系指“雏鸡”，现代被引申指未成年人或者年轻人。

喺实际生活中，“僆”表示年龄时嘅跨度好大，下至三几岁嘅小朋友，上至二十七八岁嘅成年人，都可以叫做僆妹、僆女、僆仔等，而二十至三十岁通常叫僆妹。

因为僆嘅粤语读音有啲似“靓”，所以经常俾人误为同一字而写成靓。

编辑老师打呢种粤语标题，本意系想更亲切、更本地化咁赞下我哋呢4位广东女足队员，出发点抵赞，小弟撑你。

◎阿六 律师

新闻推荐

广州市人民政府约谈六区政府房地产工作

广州日报讯（全媒体记者全杰通讯员穗住建宣）昨日，广州市人民政府约谈海珠、天河、黄埔、番禺、南沙、增城等6个区政府负...