走时光隧道过珠江

白话广州

以后广州人过江，又多咗“新路”。新闻话，有两条贯穿珠江嘅隧道，准备下个月就开工。

两条隧道，一条系会展西路过江隧道，佢连接新港东同临江大道；另一条系鱼珠隧道，佢南起新港东下穿黄埔大道后就上返地面。几年后，等佢哋通咗，海珠同天河、黄埔之间，就多咗捷径。

一条珠江穿城而过，“河南”“河北”成咗广州话特殊嘅地名。最早时，街坊过珠江要坐船，日日摇啊摇，先盼到有座桥：到咗1933年，广州第一座跨江桥海珠桥通车。加阵，横跨珠江嘅各类大桥，已经远超10条，坐车、骑车甚至行路过江，都比坐船快好多。

至于穿江隧道，就要比桥迟好多，事关隧道建造技术嘅难度。1993年，珠江隧道通车，周边街坊出行，就唔使逼晒到珠江大桥。

跨入21世纪，地铁来啦。特别是，2002年二号线通车，海珠街坊穿行“江底”到越秀，一分钟搞掂。随后三号线等亦穿江而过。如今，过江通道越来越多，譬如广州塔码头到海心沙嘅步行桥，好快就要完工了。

回顾呢啲变化，就好似穿行喺另一条隧道——时光隧道。社会嘅发展，科技嘅进步，令到“河南”“河北”连结得越来越紧密。◎闻歌 媒体人

新闻推荐

越秀网约车司机昨天集中接种

广州日报讯（全媒体记者曾卫康通讯员翟晓雪）昨日，广州市越秀区网约车司机集中接种新冠疫苗。据介绍，自3月25日启动大规模...