跨江人行桥起名

白 话广州

广州第一条横跨珠江嘅人行桥，应该叫乜名？呢几日，唔少街坊都绞尽脑汁，要帮佢起个好名。

新闻话，呢条连接广州塔同海心沙嘅步行桥，下个月底就开通。桥嘅设计师话，人行桥嘅造型，融入了岭南地域文化元素，其中桥拱就好似一座古色古香嘅岭南古琴咁。

上周，广州开始为呢座人行桥征名，仲有高达5万蚊嘅奖金添。其实，就算冇奖金，啲街坊对起名呢样嘢，都好感兴趣，尤其系对呢座备受关注嘅新桥梁。“不如就叫五羊虹”，喺网络上，有街坊话呢座桥似一条美丽嘅彩虹；亦有啲街坊就讲笑话，因为上面有小蛮腰，不如呢条桥叫“小肥臀”，听落又几可爱。

唔少街坊谂起之前为广州塔谂名嘅经过，都觉得帮呢条人行桥起名，系一个唔错嘅做法，可以调动大家嘅积极性，取一个响亮、有广州特色、又高雅大气嘅名。最重要嘅系，通过征名，令呢条桥嘅关注度、议论度都大增，成为街坊心目中嘅“网红”。

当然，无论叫乜嘢名都好，大家最期待嘅系佢早啲开通。散步喺呢条“彩虹”之上，俯瞰珠江水悠然流过，广州塔、东塔、西塔、海心沙都近在咫尺，你系唔系十分向往呢？◎闻歌 媒体人

新闻推荐

珠江人行“二桥”准备开建 连接五羊新城和二沙岛，已进入地质勘探阶段

珠江宾馆南门附近的江边人行道正在进行围蔽作业。第二座跨珠江人行桥也准备开建。信息时报记者白云摄信息时...