水果嘅俗话

白话广州

新闻讲，广州著名嘅龙岗鸡心黄皮今日上市。

早嗰排先话荔枝开卖，宜家又到黄皮嚟喇，迟啲就系龙眼“报到”，广州街坊真系有口福。

对于岭南时令水果，历来都唔差文人墨客写嘅赞美诗词。不过，小弟觉得，民间好多俗话，虽然冇华丽文句，但通俗、易懂咁讲出水果嘅特性，比诗词更接地气。

诗人写“日啖荔枝三百颗”，但俗话却提醒“一个荔枝三把火”。因为荔枝有好高水溶性蛋白，食多会上火，即广州街坊讲嘅热气。

黄皮含大量果酸、氨基酸等，饭后食有助消化，所以坊间就有咗“饥食荔枝，饱食黄皮”嘅讲法。

喺广州，食荔枝嘅时候系冇当季龙眼食嘅，因为“荔枝熟，龙眼开花未有肉”嘛。荔枝结果多数系五六月，而龙眼结果多数系七月，当荔枝熟嗰时，龙眼先啱啱开花仲未有果肉。

果树唔同方向嘅果实味道亦系有区别嘅，比如：荔枝树系西边嘅果好食啲，因为佢属长日照果树，钟意西边阳光；龙眼树属短日照果树，钟意东边阳光，所以佢东边嘅果会甜啲。由此，民间悟出咗“东边龙眼西荔枝”呢个品质标准。

水果食嘅系果肉味道，俗话“品”嘅系民间文化。

◎阿六 律师

新闻推荐

《未成年人保护法》上新，明确5类校园欺凌行为 发现校园欺凌可向公安举报

■深圳特区报记者王小虎新修订的《未成年人保护法》6月1日正式实施，增加了对校园欺凌的强制报告规定，明确了任何组织和个人...