几个粤语歇后语

白话广州

“我哋做人呢，要讲实际，讲嗰句系嗰句，千祈唔好做冇耳茶壶啊！”一早，喺街度，一对爷孙一边行，一边倾偈。个细路孭住书包，估计系老人送佢返学，顺便教下嘅孙仔做人嘅道理。广州话有句歇后语，“冇耳茶壶，得把嘴。”可以想象，一只茶壶如果唔见咗耳仔，系乜样？呢句歇后语嘅意思，系讽刺啲净识得吹牛，冇乜嘢实际本事嘅人。

忽然谂起，粤语里边，讽刺呢类人嘅歇后语真系唔少，是旦都可以搵出几个，而且相当形象，令人忍唔住笑。譬如“三斤猪头”，意思亦系“得把嘴”。点解呢？原来，猪头一般都好大只，如果只猪头得三斤咁轻，就唔大，唔怪得“得把嘴”，系咪好搞笑呢？

仲有另一个俗话，“陈显南卖告白”。旧阵时嘅广州城，有个私下行医嘅人，名叫陈显南，佢最擅长一样嘢，唔系睇病，而系卖告白，即系广告。佢嘅诊所，将啲街招，贴到街头巷尾，吹自己点叻点叻。不过，佢睇病嘅本领就半吊水，所以睇过嘅病人，都清楚佢嘅真实“本事”，所以一传十十传百，就得出个俗语——陈显南卖告白，得把口。

呢几个歇后语都好盏鬼，形象贴切咁讽刺咗嗰啲言过其实、夸夸其谈嘅人。其实，一个人有冇真本事，需要用实践来检验，而旁人嘅眼睛，都系雪亮嘅。

◎闻歌 媒体人

新闻推荐

大湾区首个在线纠纷多元化解平台上线 足不出户可完成 纠纷解决全流程

羊城晚报讯记者罗仕，通讯员段莉琼、刘文添报道：3月2日，广州互联网法院举行在线纠纷多元化解平台签约暨上线仪式。记者获悉，作...