以“水”为财

白话广州

上周，广州阴雨绵绵。讲到落雨，广州人并唔反感，因为有雨就有“水”，以水为财嘛。

广州地处珠江三角洲中部，旧时河涌交错遍布鱼塘，所以大家对水有种特别嘅亲切感。喺广州话里边，有好多同“水”有关嘅词汇，佢唔单止指代“钱”，有时仲可以用来借喻某啲事物。好似我哋经常讲嘅“磅水”“度水”“掠水”同“食水”，呢度嘅“水”就系指“钱”，分别指“俾钱”“借钱”“用不正当手段取得钱财”以及“截留金钱佣金”。

有时“水”用来指代人嘅精神面貌同所思所想。例如“心水”，意思系“心思意图”，多用于钟情某一事物；“醒水”，系指某啲人警觉精灵；“老水”就多数用来比喻嗰啲机警老练嘅后生仔；“水皮”“水斗”就系话某啲人冇学问冇本事。

最有意思嘅就系“睇水”。据讲呢个词源于以前横街窄巷所设嘅公共水龙头。旧阵时自来水仲未普及入户，好多街道都设有公共水龙头俾居民取水。去攞水嘅时候，居民要喺投币箱里边放水筹或几分钱。为防有人唔俾钱，呢啲水喉站旁边都有专职人员看管，呢啲人就系来“睇水”嘅。由此引申，“睇水”就有“把风”“望风”嘅意思。

当然，广州话里边嘅“水”绝对唔止呢几种意思，大家多用多听，自然可以领会当中嘅盏鬼有趣之处。

◎李月婷 媒体人

新闻推荐

逃离梅雨天 到东南亚海岛享受阳光

巴厘岛迷人的海岸邝颖君摄塞班岛美丽的海滨塞班岛美丽的海滨泰国甲米兰塔岛日落美景泰国甲米“神奇四岛”风光文/图羊城...