识开合嘅海珠桥

白话广州

新闻话，海珠桥下个月开始封闭39日。不过今次唔系大修，系因为起义路海珠广场嘅道路要提升品质，封桥以配合施工。

讲起海珠桥，都知道佢有好多威水嘅名堂，比如佢系中国第一座钢结构嘅“开合桥”。据《广州方志》记载，早喺清朝光绪年间，官方就提出建桥嘅提议。跟住喺1920年，又有人提过一次。不过都系因为资金、技术等方面原因搁置咗。直到1929年，建桥计划终于获批准。

建桥之前，要建一座点样嘅桥就引起咗争论。有人提议建一座传统嘅过江大桥，但系，嗰时珠江上好多船只来往，固定式嘅大桥会影响到呢啲船通行效率。咁，不如就起一座识开合嘅大桥啦。于是，一个仿照1894年竣工嘅伦敦桥嘅方案，就敲定咗。当时嘅方案系，桥嘅两边系可以向上展开，用64匹马力嘅电动机带动，一开一合只不过5分钟。展开嘅时候，就算遇到9级嘅飓风，都可以正常关闭。

1933年海珠桥建成之后，每日固定嘅时间开合三次。桥面打开嗰阵，一部部“大火船”排住队等紧过去，嗰种场面而家谂翻都好壮观。如果有船要求单独开合都系可以嘅，只要俾10蚊就可以享受专门服务。直到1938年，日寇入侵广州，海珠桥遭到轰炸，中间嘅开合机械被震坏咗，海珠桥就再冇开合过啦。◎阮栩 编辑

新闻推荐

婴儿游泳馆突然停业 会员盼退回会费律师表示商家违约应给消费者返还会费余款，并给予赔偿

律师表示商家违约应给消费者返还会费余款，并给予赔偿