行花街补一课

白话广州

每年过年，只要时间允许，我都会拣返日带小朋友去花街打个转。依家嘅小朋友，对于广府民俗听得多睇得少，有时去花街可以补下课。

最记得嘅两样嘢，一个系西关打铜，一个系糖画。前者喺荔湾花市见过，后者系喺西湖花市。早就听讲过西关打铜出名，但系要去恩宁路又的确有啲唔系咁方便。前几年喺花街上边见到打铜嘅档口，拉住小朋友就行过去。手打铜器十分精致，睇啱咗个算盘仔，细细个好得意。不过一念之差冇买到，至今后悔——小朋友算术唔好，可能就系缺咗个“会打会算”嘅神器坐镇。哈哈，讲笑。

至于糖画，唔记得有几多年冇见过喇。某年去行西湖路嘅花街，居然喺个细细个嘅档口睇到。小朋友想要只蝴蝶，师傅即刻就话“冇问题，做埋呢个就做俾你”。又唔见佢攞咩花样图案出嚟做稿，揸住个勺仔，将啲糖浆淋落胶板上边，几下手势就整咗只蝴蝶出嚟，真系叹为观止，嗰时真系好想问师傅：“你以前系唔系学美术嘎”。嗰日，小朋友揸住只蝴蝶都唔舍得食。行过条花街，回头率不知几高。

今年嘅花街怕冇呢支歌仔唱喇，卖小食嘅档口全部冇晒。糖画肯定冇喇，唔知打铜开唔开呢。◎李月婷 媒体人

新闻推荐

一线无敌江景！记者实探广船首宗宅地 1月19日开拍 各路房企已到实地考察 未来将有地铁11号线鹤洞东站

从海珠广纸板块眺望广船地块已经完全平整。在距离广州市国规委公布了荔湾广船地块旧厂更新改造实施方案批复一年多后...