唔做“大花洒”

白 话广州

“悭啲使，唔好做大花洒。”小区度，一位爸爸攞咗张钱俾仔仔买零食，仲顺便交代一声。广州话嘅“大花洒”，意思系使钱冇节制，大手大脚。

花洒系淋花嘅工具，加阵亦指冲凉嘅喷头。佢嘅出水量大定细，完全在于喷嘴。广州人将啲使钱好似流水咁嘅人，形容为大花洒，真系十分形象。

相比于父辈祖辈，加阵啲细路生活条件大幅改善，有时候喺使钱嘅问题上，确实需要家长好好引导。呢两年，睇新闻经常见到，有啲细路偷偷将父母嘅钱买游戏装备，有啲甚至花上万蚊用来“打赏”网络“主播”，包括广州都发生过。背后嘅原因，除咗细路对网络嘅沉迷之外，佢哋对钱银缺乏概念，唔懂得珍惜，系最大嘅原因。

前几年，广州啲学校俾细路培养“财商”，教啲学生理财等。计我话，除咗学识理财外，学生仲要多参加实际嘅劳动，懂得赚钱嘅唔容易。前一排中考后，我身边就有几个朋友，将佢哋刚考完试嘅细路送去餐厅、面包店等打工。我谂，多参加呢类锻炼，切身体验劳动嘅艰苦与收获，一定会令佢哋知道财富来之不易，以后就唔容易成为“大花洒”，轻易将钱财浪费系冇益嘅嘢上。

◎闻歌 媒体人

新闻推荐

聚力慈善解老幼困境 广州民政助力深化创建文明城市

志愿者带孩子们体验科学小实验。65岁的独居长者干叔住在革新路一条狭窄的巷子里。巷子老，房子也老，处处铺满了灰尘。干...