街市档主冇得弹

白 话广州

前几日有篇文章对比南方人同北方人去街市买餸嘅特点。比较有趣嘅系两个方面，第一系买餸嘅量。南方人买餸通常只系买够一餐，而北方人中意买一大堆。第二系喺呢边嘅市场买餸，你可以叫个档主帮你搞好啲手尾。而喺北方，档主一般系唔会咁做嘅。

我未喺北方生活过，呢篇文章讲嘅系唔系实情唔系咁清楚。不过对于广州嘅街市，我就绝对有发言权喇。广州人买餸，的确系食几多买几多。呢个习惯，可能同广州嘅气候有关，亦都同广州人嘅饮食习惯有关。喺广州，潮湿闷热，食物存放太耐容易变质。而且广州人食嘢讲求新鲜，原料即买即做，唔煮太多费事有剩餸，都系因为要新鲜。

至于广州街市档主嘅服务态度，就真系“湿水棉花——冇得弹”喇。去买牛肉，个档主会问你系炒定系打边炉，然后帮你切好片，炒嘅话仲腌埋添；买鱼，刮好晒啲鱼鳞劏好俾你，想斩两半又得，想叫佢“趴”喺度亦都得；买瓜买菜，丝瓜冬瓜可以帮你批好皮，连菜都可以帮你摘埋。我仲试过买大闸蟹档主搭几条紫苏过嚟，话放落啲水度同蟹一齐蒸，可以去咗啲泥腥味喔。

你话，咁样嘅档主，咁样嘅服务态度，系唔系懒人嘅“救星”？◎李月婷 媒体人

新闻推荐

逾4000个品牌展商参展 逾40万人次观展 广州美博会为美妆产业带来新机遇

广州美博会现场人潮涌动。受访者供图南方日报讯（记者/刘冠南）9月6日，为期3天的第55届中国（广州）国际美博会在琶洲会展中心顺利...