为天桥担把“遮”

白 话广州

呢排，广州唔系落雨，就系出猛热头，如果唔担遮，基本冇法出街。新闻话，广州接落来将设法俾街坊出行更舒适，其中会喺过街天桥上加装雨棚。

广东嘅热天长且雨水多，所以城市设施嘅建设要多啲谂下呢点。我嘅大学母校，就以“高架连廊”为建筑特色，学生平时上课或者返宿舍都唔使忧日晒雨淋。身处城市，有时行街遇到落雨，如果刚好冇带遮，就会特别麻烦。呢个时候，我都会谂，如果身边有个骑楼就好啦。骑楼建筑之所以好，唔单只因为佢好睇，而且贴合广州大雨大晴嘅气候特点，相当人性化。可惜，因为城市寸金寸尺土，新式嘅高楼基本都放弃咗骑楼。

呢几年，广州逐步帮唔少天桥加雨棚，无形中就好似担起一把大遮，帮过街市民遮风挡雨，佢嘅功能同骑楼系一样嘅。当然，天桥加装雨棚亦应该有讲究，计我话，如果结合绿化，用绿植或鲜花装点一下，效果就更好。尤其系夏天，绿植会吸热降温。而且，咁样会令天桥更加靓丽。

相信天桥装雨棚仅仅系一个开始，希望接落来，我哋嘅城市设施，都会好似佢咁，越来越人性化，俾街坊带来更多舒适嘅体验。◎闻歌 媒体人

新闻推荐

餐桌新文明 适量点餐公筷公勺

信息时报讯（记者何小敏）家人团圆，朋友聚会，免不了要吃上一顿饭。你一筷我一筷，吃得心满意足，却也难免有卫生隐患，吃不完打包，并不...