广州话里嘅外婆

白话广州

外婆应该叫乜嘢？近排，呢个话题喺网络上成咗热点。其实，唔同嘅地方有唔同嘅叫法。

通常，广州人对外婆都会叫“婆婆”，其中第二个“婆”字发音会比较低，读起身就好似一棵树嘅“棵”字，念第一声。千祈唔好睇少呢个差别，音调嘅唔同，意思就唔同晒：广州人见到年纪大嘅老婆婆，亦叫“婆婆”，不过读音上就有明显嘅区别，第二个“婆”字会读高音，相当于普通话嘅第二声。虽然一个音调，就可以区别亲疏，不过咁样嘅称呼，对外人来讲已经显得相当亲切，带住浓浓嘅亲情味。不过，有意思嘅系，广州人叫外公叫“公公”，但叫年纪大嘅男性老人家，就唔会用同样嘅字眼，而系叫“老伯”。到底系乜嘢原因，大家亦可以研究一下。

当然，广州系一个包容广阔嘅城市，因应自己嘅故乡风俗，唔同嘅家庭对外婆嘅称呼，亦五花八门，并冇统一嘅标准。譬如，来自粤西三市嘅人叫外婆仲系叫“外婆”；来自肇庆佛山等地嘅人，亦有人叫“阿婆”；如果屋企系客家人，据说好多叫“姐婆”；而潮汕嘅人，据说就叫“阿嫲”。

珠三角嘅水乡有一句土话，叫“差条田基，口音就唔同”，对亲属嘅称呼，估计亦系咁样。正因为有呢种唔同，先显示咗我哋中华文化嘅丰富多彩。◎闻歌 媒体人

新闻推荐

肇庆市消防局曝光九家火灾隐患单位

为做好肇庆市春夏火灾防控专项行动工作，市公安消防局联合相关职能部门开展消防安全隐患排查工作，在排查中发现9家火灾隐患...