饮杯新抱茶

白 话广州

前嗰排越秀五项区级非遗申请成功，其中一个系“广府传统婚礼习俗”。讲到婚礼习俗就成匹布咁长，其中包括择吉日、过大礼、落栊、安床、开脸、上头、出门、入门、回门等等，做足全套要成几个月咁长。喺呢一整套流程里边，有个不得不提嘅“灵魂人物”——大妗姐。

大妗姐，据讲最早出现喺北宋。据宋代《东京梦华录》记载，大妗姐负责安排成套结婚礼俗。着白衫黑裤嘅大妗姐，系新娘子嘅“守护神”。结婚嗰日，佢哋忙前忙后，仲忙过一对新人。

大妗姐唔易做，关键系要有从事呢个职业嘅资格。喺早期嘅顺德，大妗姐由自梳女充当，后来要求大妗姐“有福气”，所以就有咗“父母双全”“家庭美满”嘅入职要求。做得大妗姐，个个都口才了得，喺唔同嘅时间地点，对住唔同嘅对象，要识得对应嘅唱文。譬如入门时要讲“恭喜新安人，开枝散叶此良辰。入门旺相，夫妻长寿，白发齐眉。”敬茶呢句大家就听得多喇：“饮杯新抱茶，富贵又荣华。”除咗口才，有咩突发情况大妗姐亦都要识得第一时间化解。

当然喇，依家好少后生会跟足成个流程行完婚礼，不过嗰句“富贵又荣华”就成咗经典唱词喇。◎媒体人 李月婷

新闻推荐

佛山非遗+家具制造引领潮生活顺德皇朝家私在业界率先与佛山非遗文化相结合，打造全新家居体验

顺德皇朝家私打造的剪纸与新中式风格相融合的家具设计产品。/企业供图活动现场，嘉宾们饶有兴致地欣赏佛...