香煎一夜情

白话广州

同“一夜情”有关嘅人士唔使紧张，标题讲嘅只系一个菜名，同“咸”有关，同“情”无关，你哋唔使惊俾人香煎。

话说2月14日小弟喺龙津东路一间酒楼食饭，楼面经理噬开排牙推荐我哋食“香煎一夜情”。咦？乜东东嚟嘎？睇清楚旁边嗰张配图，妖！原来系煎鲈鱼。

众所周知，粤菜有好多有寓意嘅菜名，比如“发财就手”其实就系发菜猪手，咁呢个“一夜情”又同鲈鱼有乜Q关系呢？“经理哥哥”。呢条友耍手兼拧头：唔知，剩系知大家都系咁叫嘅。

或者系我孤陋寡闻吧，但做人总要虚心向学，唔识就要问。于是上网查，揾人问，卒之俾小弟揾到答案。我顶！乜嘢“香煎一夜情”呀，其实系“香煎一夜埕”。

以前，广东啲渔民出海打鱼，因为来回起码要两日，佢哋为咗保证返归嗰时啲鱼唔变质，就将啲鱼成条放入一个埕里面用粗盐腌一夜（埕：喺广东系指一种用嚟装酒或腌制食物嘅缸瓦器具，相当于外省人所讲嘅坛子）。后嚟大家发现，喺埕里面腌过嘅鱼，唔单只可以保质，味道仲好鬼死正，咁索性将呢种腌鱼叫做“一夜埕”，粤语“埕”“情”同音，中意搞笑嘅人就加多一执“盐”——改叫“一夜情”。好多酒楼觉得呢个名够“味”，就照板煮碗攞嚟用。

经理哥哥，“一夜情”系咁嘅意思，下次记得同客人讲喇。◎阿六 律师

新闻推荐

气血不足更易老 告别“黄脸婆”不能单靠美白

文/记者陈辉专家简介：陶双友教授、硕士研究生导师，消化内科主任医师。擅长诊治肝炎、肝硬化、口腔溃疡、顽固性便秘、溃疡...