唔做“大花洒”

白话广州

“买咁多嘢，十足大花洒。”双十一，有个朋友喺网上买咗一大堆嘢。呢几日，快递陆续到达，佢阿妈见到门口摆满晒快递箱，就话佢使钱太多，唔够悭俭。冲凉嘅花洒，喷出来嘅系水，花洒大，水就自然流出得多，而且广州人讲钱都中意用“水”来代替，所以大花洒即是花钱大手大脚。

记得细个阵时，如果零花钱一下子使晒，长辈都会笑我哋“啲钱收唔埋嘅，会咬身”。花钱几乎系人嘅本能，不过悭钱就需要理性。广州话里边，其实有好多俗语教我哋树立正确嘅消费观念，提醒我哋要量入为出，唔好变成大花洒。譬如“冇咁大个头，就唔好戴咁大顶帽”、“睇餸食饭”等等，意思好简单，并唔系叫你有钱唔使，而系因应自己嘅收入来使。如果超出自己嘅能力使钱，就叫做“辰时食卯粮”，接落来嘅日子就睇你食乜嘢。

呢啲俗语，三岁细路哥都懂，不过佢蕴含嘅道理，却并唔系人人都能体会。呢几年，好多网上借贷公司怂恿啲后生仔超前消费，连广告词都充满诱惑性，叫人想用就用，唔够使就借，背后就系利滚利嘅层层圈套，唔少后生仔中招。商家天生就有赚钱冲动，不过我哋自己亦要有“睇餸食饭”嘅理性，俾钱之前，首先摸摸自己嘅荷包，谂下老人家教落嘅道理先得。◎闻歌 媒体人

新闻推荐

八万方广州茶博会22日开幕

2018中国（广州）国际茶业博览会、第十九届广州国际茶文化节将于11月22日至11月26日在广州广交会展馆C区举行。本届展会规模...